កណ្ដាល៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថាប្រសិនបើសម្ដេចមានពេលវេលាគ្រប់គ្រាន់សម្ដេចនឹងធ្វើជាទីប្រឹក្សានៃសមាគមអ្នកនិពន្ធនិងផលិតភាពយន្តដើម្បីជួយតម្រង់ទិសដល់ការតែងនិពន្ធឬផលិតភាពយន្តបែបប្រវត្តិសាស្ត្ររបស់កម្ពុជា។

ថ្លែងនៅក្នុងពិធីជួបសំណេះសំណាលជាមួយនឹងក្រុមការងារផលិតភាពយន្តភាគរឿងកូនប្រុសក្រោមពន្លឺព្រះចន្ទពេញបូរណ៌មី នៅព្រឹកថ្ងៃទី៣១ ខែធ្នូ ឆ្នាំ២០២២ ក្នុងទីក្រុងតាខ្មៅ ខេត្តកណ្ដាល សម្ដេចតេជោបានបញ្ជាក់ថា សម្ដេចអាចជួយដល់ការនិពន្ធនិងផលិតភាពយន្តបែបប្រវត្តិសាស្ត្រកម្ពុជាចាប់តាំងពីរដ្ឋប្រហារទម្លាក់ព្រះករុណាព្រះបរមរតនកោដ្ឋ រហូតមកដល់ថ្ងៃទី២៩ ខែធ្នូឆ្នាំ១៩៩៩ ដែលកម្ពុជាបានបញ្ចប់សង្រ្គាមទាំងស្រុង តាមនយោបាយឈ្នះ ឈ្នះ។

គួរឲ្យដឹងផងដែរថានាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានឆ្លងកាត់ប្រវត្តិសាស្ត្រជាច្រើនជំនាន់ចាប់តាំងពីសម័យសង្គមរាស្ត្រនិយមពីឆ្នាំ១៩៥៥ ហើយក៏ជាសាក្សីរស់ដ៏សំខាន់បំផុតនៃដំណើរការសង្គ្តាម និងការចរចាសន្តិភាពរបស់កម្ពុជារហូតដល់កម្ពុជាបានទទួលឯករាជ្យ អធិបតេយ្យ និងមានការរួបរួមក្រោមរដ្ឋាភិបាលតែមួយដូចសព្វថ្ងៃ៕